Կանոնադրություն – Վասպուրական Հայրենակցական ՀԿ

ՀԱՍՏԱՏՎԱԾ Է «ՎԱՍՊՈՒՐԱԿԱՆ» հայրենակցական հասարակական կազմակերպության համագումարի որոշմամբ «03» մայիսի 2003 թ. «Վասպուրական» հայրենակցական Միության վարչության նախագահ՝ Բ. Հարությունյան

ԳՐԱՆՑՎԱԾ Է Պետռեգիստրի կենտրոնական մարմնի կողմից Գրանցման օրը, ամիսը Տարեթիվը_________________________ Գրանցման համարը________________ Պետական գրանցման վկայականի համարը___________________________ Պետական ռեգիստրի ղեկավար՝ Գ. Սարգսյան

Կ Ա Ն Ո Ն Ա Դ Ր ՈՒ Թ Յ ՈՒ Ն

«ՎԱՍՊՈՒՐԱԿԱՆ» հայրենակցական

հասարակական կազմակերպության

2003
ԸՆԴՀԱՆՈՒՐ ԴՐՈՒՅԹՆԵՐ

«ՎԱՍՊՈՒՐԱԿԱՆ» հայրենակցական հասարակական կազմակերպությունը (այսուհետև՝ Կազմակերպություն) իր անդամների շահերի ընդհանրության հիման վրա, հոգևոր և ոչ նյութական այլ պահանջմունքների բավարարման նպատակով ստեղծված կամավոր հասարակական միավորման տեսակ է, որը գործում է ՀՀ Սահմանադրության, ՀՀ օրենսդրության, ՀՀ միջազգային պայմանագրերի և սույն կանոնադրության հիման վրա։
1. Կազմակերպությունը գործում է օրինականության, կամավորության, անդամների իրավահավասարության, ինքնակառավարման, անդամության կամավորության, ղեկավարման կոլեգիականության և հրապարակայնության սկզբունքներով։
1. Կազմակերպությունը չի հետապնդում քաղաքական նպատակներ, չի հարում որևէ քաղաքական հոսանքի։
1. Կազմակերպությունը գործում է Հայաստանի Հանրապետության ողջ տարածքում և օտարերկրյա պետություններում՝ այդ պետությունների օրենսդրությանը համապատասխան։
1. Կազմակերպության գտնվելու վայրն է՝ Հայաստանի Հանրապետություն, 375010, Երևան, Հանրապետության փողոց, 32։

2. ՆՊԱՏԱԿՆԵՐՆ ՈՒ ԽՆԴԻՐՆԵՐԸ

«Վասպուրական» հայրենակցական հասարակական կազմակերպությունը ՀՀ տարածքում գործող կամավոր, ինքնակառավարվող, հայրենակցական, մշակութային, բարեգործական, հասարակական կազմակերպություն է: Այն միավորում է հայազգի վասպուրականցիներին և նրանց ժառանգներին: Կազմակերպությունը նպատակ ունի վառ պահել Վան-Վասպուրականի հիշողությունը, պատմական հայրենիքից անբաժան լինելու զգացողությունն ու նրան հավատարիմ մնալու գաղափարը՝ դրանք ավանդելով սերնդե-սերունդ:

Կազմակերպությունն իր գործունեությամբ լայնորեն լուսաբանում ու ժողովրդականացնում է՝

ա) Վան-Վասպուրականի պատմամշակութային ժառանգությունը, քաղաքակրթության զարգացման գործում նրա ներդրած ավանդը:

բ) Վասպուրականի հայության մղած ազգային-ազատագրական պայքարի պատմությունը, Վան-Վասպուրականի 1915 թ. Հերոսամարտի պատմական նշանակությունը, նրա հերոսների, նշանավոր մասնակիցների կյանքն ու գործը:

գ) Վասպուրականցիների և նրանց սերունդների մասնակցությունն ու ավանդը Հայաստանի երեք հանրապետությունների կայացման, երկրի տնտեսության ու մշակույթի զարգացման, Հայաստանի պետականության ամրապնդմանը նպաստելու գործում:

դ) Հայաստանում և արտերկրում բնակվող նշանավոր վասպուրականցիների, գիտնականների, գրականության, արվեստի, ազգային-հասարակական և կրոնական գործիչների կյանքն ու գործունեությունը:

Կազմակերպությունն իրականացնում է Վան-Վասպուրականի հերոսամարտը խորհրդանշող «Արծիվ Վասպուրականի» հուշակոթողի պահպանությունն ու բարեկարգումը, նպատակ ունի կառուցելու թանգարան-հուշահամալիր, հուշահամալիրի և թանգարանի տարածքը դարձնել Կազմակերպության սեփականություն:

Թանգարանային ցուցադրման նպատակով Կազմակերպությունը հավաքում է Վասպուրականի հերոսներին, նահատակներին ու եղեռնը վերապրածներին վերաբերող նյութեր և մասունքներ:

Ըստ իր ստեղծած ավանդույթի, Կազմակերպությունն ամեն տարի մայիսին, «Արծիվ Վասպուրականի» հուշակոթողի մոտ կազմակերպում է վան-վասպուրականցիների ավանդական հավաք-դաշտահանդես՝ նվիրված հերոսամարտի տարելիցներին:

Կազմակերպությունն օրենքով սահմանված կարգով կարող է իրականացնել հրատարակչական գործունեություն, տպագրելով գլխավորապես Վան-Վասպուրականին վերաբերող գործեր. գեղարվեստական երկեր, ժողովրդական բանահյուսության նմուշներ, գիտական ուսումնասիրություններ, հուշեր և այլն:

Կազմակերպությունն աշխատանք է տանում թեթևացնելու կարիքավոր հայրենակիցների հոգսերը Հայաստանում և նրա սահմաններից դուրս՝ կազմակերպելով բարեգործական միջոցառումներ:

Իր անդամի գրավոր դիմումի դեպքում, Կազմակերպությունը պաշտոնական մարմինների առջև հանդես է գալիս նրա իրավունքների ու շահերի պաշտպանությամբ:

Կազմակերպությունը կապեր է պահպանում՝

ա) Հայաստանի հայրենակցական հասարակական կազմակերպությունների և նրանց խորհրդի հետ:

բ) Տարբեր հասարակական կազմակերպությունների և ձեռնարկությունների ու գործարար շրջանների հետ:

գ) Արտերկրում գործող «Վասպուրական» հայրենակցական միությունների, մշակութային և այլ հասարակական կազմակերպությունների հետ, նրանց ներկայացուցիչներին հրավիրում է Հայաստանում կազմակերպվող միջոցառումներին, իր ներկայացուցիչների միջոցով մասնակցում արտերկրի նմանատիպ կազմակերպությունների միջոցառումներին:

Իր ամբողջ գործունեությամբ Կազմակերպությունը նպաստում է Մայր Հայրենիքի զարգացմանն ու առաջընթացին, Հայրենիք-Սփյուռք կապերի ամրապնդմանը, ժողովրդի մեջ անշեջ պահելով կորուսյալ երկրի ոչ միայն սերն ու կարոտը, այլև Վանն ու Վասպուրականը Հայաստանի կազմում տեսնելու հավատն ու համոզվածությունը:

3. ԿԱԶՄԱԿԵՐՊՈՒԹՅԱՆ ԻՐԱՎԱԿԱՆ ԿԱՐԳԱՎԻՃԱԿԸ

3.1. Կազմակերպությունը ձեռք է բերում իրավաբանական անձի կարգավիճակ՝ ՀՀ պետական ռեգիստրի կողմից Կազմակերպության պետական գրանցման պահից։

3.2. Կազմակերպությունն ունի իրավաբանական անձի համար սահմանված բոլոր իրավունքները և կրում է համապատասխան պարտականություններ.

ա) ունի առանձնացված գույք, ինքնուրույն հաշվեկշիռ, հայերեն և անգլերեն լեզուներով կլոր կնիք (որի արտաքին շրջանի մեջ գրված է «Վասպուրական» հայրենակցական հասարակական կազմակերպություն, Countrymen Social Society of “Vaspurakan”, իսկ ներքին շրջանի վերին մասում պատկերված է «Արծվի Վասպուրականին», որի ներքևի մասում ծփում են Վանա լճի ալիքները), դրոշմ, հաշվարկային հաշիվ բանկում՝ թե ՀՀ և թե օտարերկրյա արժույթով։

բ) իր անունից կարող է ձեռք բերել գույքային և ոչ գույքային իրավունքներ ու կրել պարտականություններ, որպես հայցվոր և պատասխանող հանդես գալ դատարանում։

3.3. Կազմակերպությունն ինքնուրույն է որոշում իր կազմակերպական կառուցվածքը, խնդիրները, նպատակները և գործունեության ձևերը։

3.4. Կազմակերպությունն իր կանոնադրությամբ նախատեսված նպատակները և խնդիրներն իրականացնելու համար, օրենքով սահմանված կարգով իրավունք ունի՝

ա) տեղեկատվություն տարածել իր գործունեության մասին,

բ) ներկայացնել և պաշտպանել իր անդամների իրավունքները և օրինական շահերը այլ հասարակական կազմակերպություններում, դատարանում, պետական և տեղական ինքնակառավարման մարմիններում,

գ) համագործակցել ոչ առևտրային այլ կազմակերպությունների, այդ թվում միջազգային և օտարերկրյա ոչ կառավարական, ոչ առևտրային կազմակերպությունների հետ, ինչպես նաև համակարգված գործունեություն ծավալելու, ընդհանուր շահեր ներկայացնելու և պաշտպանելու նպատակով, այդ կազմակերպությունների հետ ստեղծել միություններ, կամ անդամակցել նրանց ստեղծած միություններին՝ պահպանելով իր ինքնուրույնությունը և իրավաբանական անձի կարգավիճակը,

դ) իրականացնել ձեռնարկատիրական գործունեություն իր կողմից հիմնադրված տնտեսական ընկերությունների միջոցով,

ե) օրենսդրությամբ սահմանված կարգով ձեռք բերել, ստանալ կամ այլ պայմաններով, այդ թվում նաև անվճար, օգտագործել անշարժ գույք, հիմնական միջոցներ, տրանսպորտ, օրենքով չարգելված այլ գույք,

զ) կնքել օրենսդրությամբ չարգելված պայմանագրեր և գործարքներ,

է) օտարել, կամ վարձակալության և օգտագործման հանձնել կազմակերպությանը պատկանող ցանկացած անշարժ գույք,

ը) ինքնուրույն կազմավորել իր ֆինանսական ռեսուրսները, այդ թվում փոխառու միջոցների ներգրավմամբ, Հայաստանի Հանրապետությունում և այլ պետություններում ստանալ վարկեր, դրամաշնորհներ, այդ թվում արտարժույթով,

թ) ունենալ միջոցներ արտարժույթով և Հայաստանի Հանրապետության օրենսդրությամբ չարգելված բոլոր միջոցներով ձեռք բերել կամ ստանալ և ինքնուրույն տնօրինել,

ժ) իրականացնել ինքնուրույն արտաքին գործունեություն, իր անդամներին գործուղել արտասահմանյան երկրներ, հրավիրել այլ երկրներից քաղաքացիներ, ստեղծել առանձնացված ստորաբաժանումներ օտարերկրյա պետություններում՝ այդ պետությունների օրենսդրությանը համապատասխան։

Կազմակերպությունն իրավունք ունի իրականացնել իր կանոնադրությանը չհակասող և օրենքով չարգելված այլ գործունեություն.

ժա) կազմակերպել մրցաշարեր, ուսուցողական սեմինարներ, այդ թվում նաև միջազգային,

ժբ) հիմնադրել լրատվության միջոցներ,

ժգ) ստեղծել առանձնացված ստորաբաժանումներ՝ մասնաճյուղեր և ներկայացուցչություններ, ինչպես նաև հիմնարկներ։

4. ԿԱԶՄԱԿԵՐՊՈՒԹՅԱՆ ՊԱՐՏԱԿԱՆՈՒԹՅՈՒՆՆԵՐԸ

Կազմակերպությունը պարտավոր է՝

4.1. Ցանկացած ֆիզիկական անձի պահանջով՝ ողջամիտ ժամկետում, բայց ոչ ավելի, քան յոթ օրացուցային օրվա ընթացքում, նրան հնարավորություն տալ ծանոթանալու Կազմակերպության կանոնադրությանը։

4.2. Օրենքով սահմանված կարգով վարել գործավարություն և հաշվապահական հաշվառում։

4.3. Վարել իր անդամների հաշվառումը։

4.4. Իր գործունեության և գույքի օգտագործման հաշվետվությունները ներկայացնել Կազմակերպության ժողովի հաստատմանը, ոչ պակաս, քան երեք տարին մեկ անգամ՝ ապահովելով այդ հաշվետվությունների հրապարակայնորեն մատչելի լինելը։

4.5. Օրենքով նախատեսված դեպքերում և կարգով տեղեկատվություն ու հաշվետվություններ ներկայացնել պետական մարմիններ։

4.6. ՀՀ արդարադատության բնագավառի պետական կառավարման լիազորված մարմնի պատճառաբանված պահանջով, ողջամիտ ժամկետում, նրան տրամադրել Կազմակերպության բարձրագույն և մյուս մարմինների որոշումների պատճեները, Կազմակերպության գործունեության մասին այլ փաստաթղթեր, թույլատրել այդ մարմնի ներկայացուցիչներին ներկա գտնվելու Կազմակերպության ժողովին։

4.7. Առանձնացված ստորաբաժանում կամ հիմնարկ ստեղծելու և կազմալուծելու մասին որոշումներ ընդունելուց հետո՝ մեկամսյա ժամկետում, դիմել պետական գրանցման մարմին՝ սահմանված կարգով, դրանք հաշվառելու և հաշվառումից հանելու համար։

4.8. Օրենքով նախատեսված այլ պարտականություններ։

5. ԿԱԶՄԱԿԵՐՊՈՒԹՅԱՆ ՊԱՏԱՍԽԱՆԱՏՎՈՒԹՅՈՒՆԸ

5.1. Կազմակերպությունն իր պարտավորությունների համար պատասխանատվություն է կրում իրեն պատտկանող գույքով՝ օրենքով սահմանված կարգով։

5.2. Կազմակերպությունը պատասխանատվություն չի կրում պետության պարտավորությունների համար, ինչպես որ պետությունը պատասխանատվություն չի կրում Կազմակերպության պարտավորությունների համար։

5.3. Կազմակերպությունը պատասխանատվություն չի կրում իր անդամների պարտավորությունների համար, ինչպես որ վերջիններս պատասխանատվություն չեն կրում Կազմակերպության պարտավորությունների համար։ Եթե Կազմակերպությունն իր անօրինական գործունեությամբ վնաս է հասցրել ֆիզիկական կամ իրավաբանական անձանց, պարտավոր է այն հատուցել իր գույքի հաշվին՝ օրենքով սահմանված կարգով։

5.4. Պետությունը ապահովում է Կազմակերպության իրավունքների և օրինական շահերի պաշտպանությունը։ Պետական մարմինների և պաշտոնատար անձանց կողմից Կազմակերպության գործունեությանը միջամտելն արգելվում է, բացառությամբ օրենքով սահմանված դեպքերի։

5.5. Կազմակերպությանը հասցված վնասը, որը հետևանք է պետական կամ այլ մարմինների, կամ նրանց պաշտոնատար անձանց կողմից Կազմակերպության իրավունքների խախտման, ՀՀ օրենսդրությամբ սահմանված պարտավորությունների ոչ պատշաճ կատարման, ենթակա է փոխհատուցման այդ մարմինների կողմից՝ ՀՀ օրենսդրությամբ սահմանված կարգով։

5.6. Անձի անդամակցությունը Կազմակերպությանը չի կարող հանդիսանալ նրա իրավունքների և ազատությունների սահմանափակման հիմք, պետական մարմիններում պաշտոն զբաղեցնելու պայման կամ արգելք։

Արգելվում է Կազմակերպության անդամությունը նշելու պահանջը։

6. ԿԱԶՄԱԿԵՐՊՈՒԹՅԱՆ ԱՆԴԱՄՈՒԹՅՈՒՆԸ, ԿԱԶՄԱԿԵՐՊՈՒԹՅԱՆՆ ԱՆԴԱՄԱԳՐՎԵԼՈՒ ԵՎ ԴՈՒՐՍ ԳԱԼՈՒ ԿԱՐԳԸ

6.1. Մինչև տասնչորս տարեկան անչափահասը Կազմակերպությանը կարող է անդամագրվել իր ցանկությամբ՝ օրինական ներկայացուցչի դիմումի հիման վրա։ Տասնչորսից մինչև տասնութ տարեկան անչափահասը, եթե օրենքով սահմանված կարգով լրիվ գործունակ չի ճանաչված, Կազմակերպությանը կարող է անդամագրվել իր դիմումի հիման վրա, օրինական ներկայացուցչի գրավոր համաձայնությամբ։ Կազմակերպության անդամն ունենում է անդամատոմս։

Կազմակերպության անդամ դառնալ ցանկացող անձինք Կազմակերպության վարչության (այսուհետև՝ վարչություն) պետք է ներկայացնեն գրավոր դիմում՝ մուծելով մուտքի վճար, որի չափը և վճարման կարգը սահմանվում է վարչության կողմից։

6.2. Կազմակերպության անդամության մեջ ընդունելու հարցը լուծում է Կազմակերպության վարչությունը։ Կազմակերպության անդամության մեջ ընդունելու մասին դիմումի մերժումը գանգատարկման ենթակա չէ։

6.3. Կազմակերպության անդամները մուծում են անդամավճար, որի չափն ու վճարման կարգը սահմանվում է Կազմակերպության վարչության կողմից։

6.4. Կազմակերպության պատվավոր անդամ կարող են լինել նրանք, ովքեր էական ներդրում ունեն Վասպուրականի պատմության և մշակույթի ուսումնասիրման ու քարոզչության գործում, ինչպես նաև այն անձինք, ովքեր բարոյապես ու նյութապես աջակցում են Կազմակերպության գործունեությանը։ Պատվավոր անդամություն շնորհվում է Կազմակերպության վարչության որոշմամբ։ Կազմակերպության պատվավոր անդամն ունենում է վկայագիր։

7. ԿԱԶՄԱԿԵՐՊՈՒԹՅԱՆ ԱՆԴԱՄՆԵՐԻ ԻՐԱՎՈՒՆՔՆԵՐՆ ՈՒ ՊԱՐՏԱԿԱՆՈՒԹՅՈՒՆՆԵՐԸ

7.1. Կազմակերպության անդամն իրավունք ունի՝

ա) ներկա գտնվել Կազմակերպության համագումարին, եթե ինքը պատվիրակ չի ընտրվել,

բ) ծանոթանալ Կազմակերպության մարմինների աշխատանքի արձանագրման մասին փաստաթղթերին, ստանալ նրանց ընդունած որոշումների պատճեները (պատճեների տրամադրման համար գանձվող վճարը չի կարող գերազանցել դրանց պատրաստման համար անհրաժեշտ ծախսերը),

գ) Կազմակերպության մարմինների որոշումները բողոքարկել Կազմակերպության վերադաս մարմիններ՝ Կազմակերպության կանոնադրությամբ սահմանված կարգով,

դ) Կազմակերպության մարմնի (այդ թվում՝ բարձրագույն մարմնի) որոշումը, որն ընդունվել է օրենքի, Կազմակերպության կանոնադրության կամ վերադաս մարմինների որոշումներով սահմանված կարգի խախտմամբ, կամ ոտնահարել է Կազմակերպության անդամի իրավունքներն ու օրինական շահերը, կարող է դատական կարգով անվավեր ճանաչվել Կազմակերպության անդամի դիմումի հիման վրա։ Նման դիմում կարող է տրվել 60 օրվա ընթացքում՝ սկսած այն օրվանից, երբ Կազմակերպության անդամն իմացել է կամ պարտավոր էր իմանալ այդպիսի որոշման ընդունման մասին, եթե օրենքով այլ բան սահմանված չէ։

7.2. Կազմակերպության անդամը պարտավոր է՝

ա) հոգ տանել Կազմակերպության հեղինակության բարձրացման համար,

բ) կատարել Կազմակերպության կանոնադրական պահանջները, ղեկավար մարմինների որոշումները,

գ) աջակցել Կազմակերպության անդամության համալրմանը,

դ) մուծել մուտքի վճար և անդամավճար,

ե) բարեխղճորեն կատարել իր վրա դրված պարտականությունները։

Կազմակերպության կանոնադրության, կարգապահական կանոնները խախտող Կազմակերպության անդամի նկատմամբ Կազմակերպության համագումարի կամ վարչության կողմից կարող են կիրառվել կարգապահական տույժի միջոցներ՝ ընդհուպ Կազմակերպության անդամությունից հեռացումը։

7.3. Կազմակերպության անդամությունից հեռացնելու մասին Կազմակերպության վարչության որոշումը կարող է գանգատարկվել Կազմակերպության համագումարին։

8. ԿԱԶՄԱԿԵՐՊՈՒԹՅԱՆ ԿԱԶՄԱԿԵՐՊԱԿԱՆ ԿԱՌՈՒՑՎԱԾՔԸ

8.1. Կազմակերպության բարձրագույն մարմինը համագումարն է, որին պատկանում է Կազմակերպության կառավարման և գործունեության ցանկացած հարցի վերջնական լուծման իրավունքը։

8.2. Կազմակերպության համագումար հրավիրվում է ոչ պակաս, քան երկու 2 տարին մեկ անգամ վարչության որոշմամբ կամ Կազմակերպության անդամների առնվազն 1/3-ի նախաձեռնությամբ։ Վարչության կողմից ժողովի օրակարգի, նրա աշխատանքն սկսելու տեղի, օրվա ու ժամի մասին մասնակիցները տեղյակ են պահվում ոչ որշ, քան ժողովի անցկացման օրվանից 14 օր առաջ։ կազմակերպության անդամների 1/3-ի կամ Կազմակերպության վերահսկիչ հանձնաժողովի (վերահսկիչի) պատճառաբանված պահանջի դեպքում, ոչ ուշ, քան 14 օրացուցային օրվա ընթացքում, հրավիրվում և տեղի է ունենում Կազմակերպության արտահերթ ժողով։

8.3. Կազմակերպության համագումարի բացառիկ իրավասության հարցերն են՝

ա) կազմակերպության կանոնադրության ընդունումը, նրանում փոփոխությունների ու լրացումների կատարումը,

բ) կազմակերպության գործունեության և գույքի օգտագործման հաշվետվությունների հաստատումը։

գ) երկու տարի ժամկետով Կազմակերպության վարչության, նախագահի, փոխնախագահների, պատասխանատու քարտուղարի ընտրումը և ետ կանչումը ու կազմի փոփոխումը,

դ) երկու տարի ժամկետով վերահսկիչ հանձնաժողովի (վերահսկիչի) անդամների ընտրումը, ետ կանչումը և կազմի փոփոխումը,

ե) Կազմակերպության լուծարումն ու վերակազմակերպումը։

Սույն կետով սահմանված հարցերի քննարկման ժամանակ որոշումներն ընդունվում են կազմակերպության համագումարի բոլոր մասնակիցների երկու երրորդի մեծամասնությամբ։ Մնացած հարցերով որոշումներն ընդունվում են ձայների պարզ մեծամասնությամբ։

8.4. Կազմակերպության համագումարը կարող է հարցեր քննարկել և որոշումներ կայացնել, եթե նրան մասնակցում են պատվիրակների կեսից ավելին։

8.5. Կազմակերպության վարչությունն ընտրվում է համագումարի կողմից երկու տարի ժամկետով։ Նա իր աշխատանքներն իրականացնում է նիստերի ձևով, որոնք հրավիրվում են յուրաքանչյուր երկու ամիսը մեկ անգամ։ Վարչության անդամների մեկ երրորդի կամ նախագահի պահանջով կարող է հրավիրվել արտահերթ նիստեր։

8.6. Վարչությունը՝

ա) հանդիսանում է Կազմակերպության ղեկավար մարմինը համագումարների միջև ընկած ժամանակահատվածում․

բ) առաջարկություններ է ներկայացնում Կազմակերպության ընդհանուր ժողովին՝ նրա բացառիկ իրավասությանը վերաբերող հարցերի վերաբերյալ,

գ) ընդունում է Կազմակերպության անդամ և ազատում է անդամությունից,

դ) Կազմակերպության անդամների նկատմամբ կիրառում է խրախուսանքներ և տույժի միջոցներ,

ե) վարում է Կազմակերպության ընթացիկ գործունեությունը համագումարների միջև ընկած ժամանակաշրջանում,

զ) սահմանում է Կազմակերպության կարգապահական կանոնները և հրահանգները,

է) սահմանում է Կազմակերպության անդամների կողմից անդամավճարների մուծման կարգը, չափերը և ձևերը,

ը) ստեղծում ու լուծարում է Կազմակերպության կառուցվածքային միավորումները, առանձնացված ստորաբաժանումները (մասնաճյուղեր, ներկայացուցչություններ), ինչպես նաև հաստատում է նրանց կանոնադրությունները,

թ) ընդունում է որոշումներ Կազմակերպության պաշտոնատար անձանց գույքային պատասխանատվության ենթարկելու մասին,

ժ) իրավասու է որոշումներ ընդունել գույք ձեռք բերելու, տիրապետելու, օգտագործելու, տնօրինելու, այդ թվում՝ օտարելու և դուրս գրելու վերաբերյալ․

ի) իրավունք ունի քննել ու լուծել ցանկացած հարց, բացառությամբ Կազմակերպության համագումարի բացառիկ իրավասությանը վերապահվածներից։

8.7. Կազմակերպության վարչությունը կարող է հարցեր քննարկել և որոշումներ կայացնել, եթե նրան մասնակցում են վարչության անդամների կեսից ավելին։

Վարչության որոշումներն ընդունվում են ձայների պարզ մեծամասնությամբ։ Ձայների հավասարության դեպքում նախագահի ձայնը վճռորոշ է։

8.8. Կազմակերպության նախագահն ընտրվում է վարչության կողմից երկու տարի ժամկետով։ Նա ի պաշտոնե հանդիսանում է վարչության նախագահը։

8.9. Կազմակերպության նախագահը՝

Իրականացնում է կազմակերպության ընթացիկ ղեկավարումը.
Հրավիրում է վարչության նիստեր, կոորդինացնում է վարչության և վերահսկիչ հանձնաժողովի գործունեությունը.
Կազմակերպության նախագահն իր պաշտոնն ստանձնում է նախորդ նախագահի լիազորությունների ավարտման օրը.
Կազմակերպության գործադիր տնօրենը նշանակվում է վարչության կողմից իր իրավասության սահմաններում առանց լիազորագրի գործում է Կազմակերպության անունից, ներկայացնում է դրա շահերը, այդ թվում և աշխատանքային, Կազմակերպության վարձու աշխատողների համար իրականացնում է գործատուի ֆունկցիաներ, տալիս է հաշիվներ, հաստատում է հաստիքներ, արձակում է հրամաններ, վարձու աշխատողներին տալիս է կատարման համար պարտադիր ցուցումներ։
Կազմակերպությունը կարող է ունենալ պատվավոր նախագահ, որն ընտրվում է համագումարի կողմից ցմահ։ Կազմակերպության պատվավոր նախագահը համարվում է կազմակերպության նախագահության անդամ։ Համագումարն ընտրում է վարչությանն առընթեր երիտասարդական հանձնախումբ, որի քանակական կազմը որոշում է համագումարը։
Կազմակերպության պատասխանատու քարտուղարը ընտրվում է վարչության կողմից երկու տարի ժամկետով, կոորդինացնում է Կազմակերպության առանձնացված ստորաբաժանումների աշխատանքները, կազմակերպում է Կազմակերպության գործավարությունը, Կազմակերպության անդամագրության աշխատանքները, տնօրինում է Կազմակերպության արխիվը, կատարում է Կազմակերպության նախագահի կողմից իր վրա դրված առանձին լիազորություններ։ Կազմակերպության իրենց չարդարացրած բոլոր ընտրովի պաշտոնատար անձինք կարող են ժամկետից շուտ ետ կանչվել իրենց ընտրողների կողմից։

Կազմակերպության նախագահը և ղեկավար մարմնում ընդգրկված այլ անձինք Կազմակերպության կողմից կարող են վարձատրվել, եթե նրանց մշտական աշխատանքի վայրը համարվում է Կազմակերպությունը։

Կազմակերպության ղեկավար մարմնում ընդգրկված վերոհիշյալ անձանց վարձատրության չափը սահմանում է Կազմակերպության վարչությունը։

8.10. Կազմակերպության վերահսկիչ հանձնաժողովը (կամ վերահսկիչը) ընտրվում է համագումարի կողմից երկու տարի ժամանակով։

8.11. Կազմակերպության վերահսկիչ հանձնաժողովը կարող է հարցեր քննարկել և որոշումներ կայացնել, եթե նրան մասնակցում են հանձնաժողովի անդամների կեսից ավելին։ Հանձնաժողովի որոշումներն ընդունվում են ձայների պարզ մեծամասնությամբ։ Ձայների հավասարության դեպքում հանձնաժողովի նախագահի ձայնը վճռորոշ է։ Վերահսկիչը որոշումներ է ընդունում միանձնյա։

8.12. Կազմակերպության վերահսկիչ հանձնաժողովը (վերահսկիչը) իրավասու՝

ցանկացած ժամանակ անցկացնել կազմակերպության ֆինանսատնտեսական գործունեության ստուգում.
ծանոթանալ Կազմակերպության գործունեությանն առնչվող բոլոր փաստաթղթերին.
Կազմակերպության կանոնադրությամբ սահմանված կարգով պարտադիր քննարկման ենթակա առաջարկություններ ներկայացնել Կազմակերպության մարմիններ.
Կազմակերպության պաշտոնատար անձանցից, անդամներից ու աշխատողներից պահանջել և ստանալ գրավոր ու բանավոր տեղեկատվություն.
Իրականացնել Կազմակերպության կանոնադրությունից կամ բարձրագույն մարմնի որոշումներից բխող այլ լիազորություններ։

8.13. Կազմակերպության վերահսկիչ հանձնաժողովը պարտավոր է հաշվետվություն ներկայացնել Կազմակերպության համագումարին՝ Կազմակերպության գործունեության արդյունքների, հաշվեկշռի, գույքի պահպանման և այլ ամփոփ տվյալների մասին։ Վերստուգիչ հանձնաժողովի անդամներ կամ վերահսկիչ չեն կարող լինել վարչության անդամները և նախագահը։

8.14. Կազմակերպության ղեկավար և վերահսկողություն իրականացնող մարմինների անդամ կարող է դառնալ միայն 18 տարին լրացած անձը։

9. ԿԱԶՄԱԿԵՐՊՈՒԹՅԱՆ ԱՌԱՆՁՆԱՑՎԱԾ ՍՏՈՐԱԲԱԺԱՆՈՒՄՆԵՐԸ

9.1. Կազմակերպությունն իր կանոնադրական նպատակները և խնդիրներն իրականացնելու նպատակով կարող է ստեղծել առանձնացված ստորաբաժանումներ՝ մասնաճյուղեր և ներկայացուցչություններ։

9.2. Կազմակերպության առանձնացված ստորաբաժանումներն իրավաբանական անձ չեն, կարող են օժտվել գույքով իրենց ստեղծող Կազմակերպության կողմից և գործում են վերջիններիս կողմից հաստատված կանոնարդության վրա։

9.3. Կազմակերպության առանձնացված ստորաբաժանումներ հիմնադրելու իրավունք ունի Կազմակերպության վարչությունը, որն էլ հաստատում է նրանց կանոնադրությունները։

10. ԿԱԶՄԱԿԵՐՊՈՒԹՅԱՆ ՍԵՓԱԿԱՆՈՒԹՅՈՒՆԸ, ԳՈՅԱՑՄԱՆ ԱՂԲՅՈՒՐՆԵՐԸ ԵՎ ՕԳՏԱԳՈՐԾՄԱՆ ԿԱՐԳԸ

10.1. Կազմակերպության գույքը հանդիսանում է Կազմակերպության սեփականությունը։

10.2. Կազմակերպությունը որպես սեփականություն կարող է ունենալ՝ շենքեր, շինություններ, բնակարանային ֆոնդ, տրանսպորտային միջոցներ, սարքավորումներ, դրամական միջոցներ, արժեթղթեր և օրենքով չարգելված այլ գույք։

Կազմակերպության անդամը նրա սեփականության նկատմամբ բաժնի իրավունք չունի։

10.3. Կազմակերպության գույքի ստացման աղբյուրներ կարող են լինել՝

Կազմակերպության անդամների անդամավճարները, դրամական և նյութական ներդրումները, նրա կողմից գույքի տիրապետելու, այն օգտագործելու, ինչպես նաև այլ գույքային իրավունքների փոխանցումը.
բանկային հիմնարկներից ստացված վարկերը.
դրամաշնորհները.
բարեգործական ներդրումները, քաղաքացիների և կազմակերպությունների կողմից փոխանցված գումարները.
ՀՀ օրենսդրությամբ չարգելված այլ մուտքեր և աղբյուրներ։

10.4. Հայաստանի Հանրապետության տարածքում Կազմակերպության սեփականությունը գտնվում է Հայաստանի Հանրապետության պաշտպանության ներքո։

10.5. Կազմակերպության սեփականությունը կարող է բռնագանձել միայն օրենքով սահմանված կարգով։

10.6. Կազմակերպության միջոցները կարող են օգտագործվել միայն կանոնադրությամբ սահմանված նպատակների և խնդիրների իրականացման համար։

11. ԿԱԶՄԱԿԵՐՊՈՒԹՅԱՆ ՎԵՐԱԿԱԶՄԱԿԵՐՊՈՒՄԸ ԵՎ ԼՈՒԾԱՐՈՒՄԸ

11.1. Կազմակերպության վերակազմակերպումը իրականացվում է նրա համագումարի որոշմամբ՝ օրենքով սահմանված կարգով։

Կազմակերպության համագումարը պարտավոր է Կազմակերպության վերակազմակերպման մասին հնգօրյա ժամկետում գրավոր հայտնել Կազմակերպության պարտատերերին։

11.2. Կազմակերպության լուծարումը հանգեցնում է դրա դադարեցմանը առանց իրավունքները և պարտականություններն իրավահաջողության կարգով այլ անձանց անցնելու։

11.3. Կազմակերպությունը կարող է լուծարվել Կազմակերպության համագումարի կամ դատարանի որոշմամբ։

Կազմակերպության ընդհանուր ժողովը լուծարման մասին պարտավոր է հնգօրյա ժամկետում գրավոր հայտնել ՀՀ արդարադատության նախարարությանը։

Կազմակերպության ընդհանուր ժողովը ՀՀ արդարադատության նախարարության համաձայնությամբ կազմավորում է լուծարային հանձնաժողով և օրենքով նախատեսված կարգով սահմանում է լուծարման կարգը և ժամկետները։

11.4. Կազմակերպության լուծարման դեպքում լուծարքային հանձնաժողովը պարտադիր վճարումներն իրականացնելուց հետո մնացած գույքը, լուծարման մասին որոշում կայացրած մարմնի կողմից սահմանված կարգով օգտագործում է նրա կանոնադրական նպատակների և խնդիրների իրականացման համար, եթե անհնար է, ապա փոխանցվում է պետական բյուջե, իսկ վեճի առկայության դեպքում հարցը լուծում է դատարանը։

11.5. Կազմակերպության լուծարման դեպքում պարտատերերի պահանջները բավարարվում են օրենքով սահմանված կարգով։